तस्बिरमा हेर्नुहोस् बारा, चितवन र तनहुँको उपनिर्वाचन

काठमाडौँ । प्रतिनिधिसभा सदस्य रिक्त रहेका तीन निर्वाचन क्षेत्रमा आइतबार मतदान भइरहेको छ । तनहुँ–१, बारा–२ र चितवन २ मा उपनिर्वाचन भइरहेको हो । 

तीन वटै निर्वाचन क्षेत्रमा उपनिर्वाचन शान्तिपूर्ण रुपमा भइरहेको सम्बन्धित निर्वाचन अधिकृत कार्यालयले जनाएका छन् । बिहान ७ बजेदेखि सुरु भएको मतदान साँझ ५ बजेसम्म जारी रहनेछ । 

 तीन निर्वाचन क्षेत्रमध्ये आइतबार बिहान १० बजेसम्म चितवन २ मा सबैभन्दा धेरै मत खसेको छ । सहायक मतदान अधिकृत ईश्वरी आचार्यले चितवन २ मा बिहान १० बजेसम्म १७ प्रतिशत मतदान भएको जानकारी दिए । 

यसैगरी तनहुँ १ मा बिहान १० बजेसम्म १३.६ प्रतिशत मत खसेको जिल्ला निर्वाचन  कार्यालयका प्रमुख हरिप्रसाद ढकालले जानकारी दिए । 

यसैगरी बारा २ मा भइरहेको उपनिर्वाचनमा बिहान १० बजेसम्म १५ प्रतिशत मत खसेको  छ । जिल्ला प्रहरी कार्यालय बाराका प्रमुख एसपी होबिन्द्र बोगटीका अनुसार शान्तिपूर्ण भइरहेको निर्वाचनमा बिहान १० बजेसम्म १५ प्रतिशत मत खसेको हो ।