रेशम सापकोटा – पत्रीका प्रेस ।
माडी चितवन
चितवन जिल्ला माडी नगरपालिका–८ स्थित हरियालीले सुशोभित बैकुण्ठ सामुदायिक वनको जङ्गल क्षेत्रभित्र निर्माण हुँदै गरेको बुद्ध पार्क ले माडी क्षेत्रको धार्मिक, सांस्कृतिक, पर्यावरणीय र पर्यटन विकासमा ऐतिहासिक मोड ल्याउने विश्वास गरिएको छ। जापानी समाजसेवी मिहो तानवाराको आर्थिक सहयोग र स्थानीय जनसहभागिताको जगमा सुरु भएको यो परियोजना अध्यात्म, शान्ति र समृद्धिको यात्राको प्रतीक बन्दै गएको छ।
करीब ५ विघा क्षेत्रफलमा फैलिने लक्ष्यसहित निर्माण भइरहेको यो बुद्ध पार्कमा प्रवेशद्वार, सिंढी, सत्तल, स्तुपा, ध्यान केन्द्र, पर्खालजस्ता पूर्वाधार निर्माण हुनेछन भने आगामी चरणमा आखण्ड बुद्ध बिहार र बुद्ध कलेज सञ्चालन गर्ने दीर्घकालीन योजना राखिएको छ। निर्माण समितिका उपाध्यक्ष मोहन आलेमगरका अनुसार मिहो तानवाराको प्रारम्भिक २ लाख रुपैयाँ सहयोगले कार्यको गति बढेको हो। तानवाराले यो सुरुआत भएको र भविष्यमा बहुप्रतिमूर्ति स्थापनासहित व्यापक विकास गर्ने लक्ष लिनुभयको छ।
बौद्ध धर्ममा समर्पित संस्था चुजी फाउन्डेसनका कन्ट्री डाइरेक्टर डा. नितेश शाक्यको नेतृत्वमा २० जना वरिष्ठ लामा गुरुहरूको टोलीले स्थलगत अध्ययन गरी ध्यान र साधनाका लागि उपयुक्त क्षेत्र भएको निष्कर्ष निकाल्दै बुद्ध धर्म प्रवर्द्धनका लागि पूर्ण समर्थन जनाएका छन्। डा. शाक्यले स्थानीय सरकार, वडाकार्यालय र समुदायको सक्रिय सहभागिता देख्दा फाउन्डेसनबाट सहकार्य र दीर्घकालीन समर्थन गर्ने प्रतिबद्धता व्यक्त गर्नुभएको छ।
त्यसैगरी, समाजसेवी मिहो तानवाराले भन्नुभयो, “स्थानीय वडाहरू र नगरपालिकाबाट आधारभूत संरचना निर्माणका लागि सहयोग पाउँदा हामीलाई थप योजना बनाउने हौसला मिलेको छ। किनभने समाजको आवश्यकता बुझ्दै, उक्त स्थानको विकास गर्नु हाम्रो साझा जिम्मेवारी हो।”
२०८२ वैशाख २९ गते बुद्ध जयन्तीको पावन अवसरमा नगरप्रमुख ताराकाजी महतो र जापानी समाजसेवी मिहो तानवाराले संयुक्त रूपमा बुद्ध पार्कको शिलान्यास गर्नुभएको थियो। २५६९औँ बुद्ध जन्मजयन्तीको दिन पञ्चेबाजा, बौद्ध स्तोत्र र परम्परागत परिपाटीअनुसार भव्य समारोह आयोजना गरिएको थियो। सोही दिन पूर्णकदको बुद्ध मूर्तिको नमुना पनि सार्वजनिक गरिएको थियो । बुद्ध पार्क भित्र बन्ने स्थायी मूर्ति साथै अन्य निर्माणका कामहरू गर्न मिहो तानवाराले चुजी फाउन्डेसन सहित विभिन्न संघ संस्था सङ सहकार्य अगाडि बढाउने कुरा बुद्ध पार्क निर्माण समितिका संयोजक कृष्णराज अधिकारीले जानकारी दिनुभयो।
अधिकारीले भन्नुभयो बुद्ध पार्कले हिन्दू–बौद्ध धार्मिक सहअस्तित्व, सहिष्णुता र साझा मानवीय मूल्यहरूलाई उजागर गर्नेछ। कर्म, पुनर्जन्म, मुक्ति र ध्यानजस्ता दुवै धर्मका साझा धारणा बोकेको यो स्थल धर्म, संस्कृति र मानवताको साझा चौतारी बन्ने लक्ष्यसहित अघि बढाइएको छ ।
बैकुण्ठधामका अध्यक्ष राजकुमार परिवारले भने, हिन्दू र बौद्ध धर्मबीचको सम्बन्ध सामाजिक सद्भाव र धार्मिक एकताको उदाहरण हो। यस्तो स्थानले युवा पुस्तामा चेतनाको बिकास गर्दछ।
देवेन्द्रपुर–जगन्नाथपुर सम्पर्क मञ्च, भरतपुर–चितवनका अध्यक्ष पूर्णप्रसाद पोखरेलले ऐतिहासिक, पुरातात्त्विक र धार्मिक दृष्टिले महत्वपूर्ण क्षेत्रमा बुद्ध पार्कको स्थापना हुनुले दीर्घकालीन प्रभाव पार्ने विश्वास व्यक्त गर्नुभयो।
यसैबीच, बुद्ध पार्कको शिलान्यास कार्यक्रममा माडी नगरपालिकाकी प्रमुख ताराकाजी महतो र यसै वडाका वडा अध्यक्ष बिरेन्द्र बहादुर भण्डारीले यसै आर्थिक वर्षमा माडी नगरपालिका र वडा मार्फत सत्तल, शौचालय र श्रेणी निर्माण कार्य अगाडि बढाइने बताउनुभयो। यो कुराले हामीलाई थप ऊर्जा र काम गर्ने हौसला मिलेको मिहो तानवाराको भनाइ छ।
धार्मिक पर्यटन, अध्यात्म र वातावरण संरक्षणको संयोजनमार्फत माडी क्षेत्रलाई राष्ट्रिय तथा अन्तर्राष्ट्रिय स्तरमा चिनाउने सपना बोकेको बुद्ध पार्कले शान्तिको सन्देश फैलाउँदै नेपालको एक शान्तिपूर्ण गन्तव्यको रूपमा माडीलाई स्थापित गर्ने विश्वास स्थानीयवासीहरूले व्यक्त गरेका छन्।