नारायणगढ–मुग्लिन सडक खण्डको तुइन खोलामा पहिरो खसेर मेसिन अपरेटरको मृत्यु

चितवन, जेठ १३ – नारायणगढ–मुग्लिन सडक खण्ड अन्तरगत आज आइतबार बिहान तुइन खोला नजिक पहिरो खसेर मेसिन अपरेटरको मृत्यु भएको छ ।
सडकको नाला खन्ने क्रममा पुल निर्माण कम्पनी एएनकेको मेसिन माथि पहिरो खस्दा ढुङाले मेशिन च्याप्दा अपरेटरको मृत्यु भएको सडक डिभिजन भरतपुरले जानकारी दिएको छ । पहिराेले मेसिनमा पनि क्षति पुगेको र अर्को एक सवारी साधनमा पनि क्षती पुगेको छ ।
पहिरो खसेर मेसिनमै च्यापिएका अपरेटरलाई बाहिर निकालेर सडक दुईतर्फी सञ्चालनमा ल्याइएको जनाइएको छ । घटनाको बारेमा बुझ्न नारायणगढ–मुग्लिन सडक आयोजनाका अधिकारीहरु घटनास्थलमा जाँदैछन् । मृत्यु भएका अपरेटरको नाम ठेगाना खुल्न सकेको छैन ।